Gobierno tin atencion pa proyecto di pool natural, na lugar di Natural Bridge

ORANJESTAD (AAN) — September ta acercando y Natural Bridge ta cumpli un aña mas di a cay den otro y bira un ruina. Hopi ta esnan, y specialmente famianan biba den e vecindario y specialmente un di nan cu ta maneha un negoshi den e area, ta puntra ki dia gobierno ta bay desaroya un proyecto cu por reemplaza e atraccion cu e brug natural tabata brinda y cu hopi turista te ainda a recorda. Matutino DIARIO a tene un entrevista cu Minister di Infrastructura sr. Benny Sevinger riba e asunto aki. E dignatario a comenta cu gobierno a haya varios sugerencia, specialmente for di e doñonan di un tienda y snack cu tin unda cu e puente natural ta ubica, cu a bin cu e idea di habri e entrada unda e puente tabata y traha un pool natural, lagando e awa drenta pa crea henter un desaroyo eynan pa uso di nos hendenan local y di turismo, ademas di otro actividadnan rond di dje.

Minister Sevinger a duna di conoce cu e proyecto a worde manda pa DOW, pa pinta e proyecto y wak si por bin cu un plan concreto, pero esaki ta hiba su proceso, y den tur e plannan cu gobierno ta desaroyando aworaki, no por traha full time riba e proyecto menciona, pero gobierno ta poniendo atencion riba dje.
E mandatario tambe a expresa bon cla, cu gobierno mester wak for di unda ta saca e placa pa inverti den e proyecto aki, cu sigur ta uno bunita pero mester traha prome riba e prioridadnan cu tin, cu ta e renovacion di Oranjestad y San Nicolas, y 24 bario rond di aruba y esaki ta tumando tur e tempo cu e departamentonan concerni tin disponible.
Pero asina cu gobierno ta adelanta cu e diferente proyectonan menciona, lo dedica mas atencion na e desaroyo nobo pa Natural Bridge, cu tambe ta importante pa producto Aruba. E mandatario a subraya cu aunke gobierno no ta trahando full speed riba dje, e tin su atencion.
Minister Sevinger a comenta cu el a bishita varios pool natural na diferente pais, entre otro na Portugal, den Madeira, y ta varios miyon Florin e lo costa pa traha algo similar na Aruba.
No ta trata di un trabao facil pasobra mester habri e espacio pa lama drenta, pa e fluho di awa por sali y drenta, di manera cu no tin contaminacion di e awanan, y pa no tin problema pa e usuarionan, ya sea cu e area ta bira un beach of un pool natural.
Estudionan tin cu worde haci, pa wak si lo desaroya kiosconan, parkinglot, etc., rond di dje, e lo bay costa un par di miyon cu na su debido tempo, gobierno mester busca fondo pe.
E dignatario a agrega cu den e ROP cu ta e plan di ordenanza teritorial di Aruba, pa e tipo di proyectonan di naturaleza manera esaki, tin cu keda mantene e tipo di camindanan cu no ta asfalt, pasobra e no ta cuadra cu e medio ambiente di unda e puente natural ta situa.
Kiermen, mester keda tene e camindanan di santo y podise drecha e camindanan unda cu awa ta pasa cu piedra, y den e caso aki, segun minister Sevinger, gobierno ta prefera pa e caminda keda mas natural posible.

http://www.diario.aw

Anuncios

Los comentarios están cerrados.