Partisipáshon na e 21 INTERPOL Konferensha Regional di Amerika na Aruba

Durante e periodo di 6 pa 8 di yüli 2011 un delegashon di Kòrsou a asistí na e di Bintiun (21) Konferensha Regional di Amerika di INTERPOL, organisá na isla di Aruba. E delegashon di Kòrsou tabata konsistí pa e hefe di delegashon, Alto Komisario di Polis, Sr. R.T. Meulens, Hefe di Centrale Politie Dienst, Komisario di Polis, Sr. R.P. Ellis, Hefe di Recheche i Servisio di Inteligensia, Alto Inspektor, Sr. N.C.L. Minguel, Hefe di e Ofisina di Interpol Willemstad i Sr. G.L. Isena, asesor prinsipal di maneho (senior beleidsmedewerker) di e Organisashon pa Asuntunan Eksterior di Kòrsou.

Na e reunion a partisipá  30 pais di e region Amerikano i tambe algun invitado di otro pais ku ta kai pafó di e region. Ta tin un total di 120 partisipante.

Sr. Ronald K. Noble, Sekretario General di INTERPOL durante su presentashon a bisa ku e ta masha kontentu mes di mira representantenan di dos pais outónomo den Reinado Hulandes: Kòrsou i St. Maarten na e konferensha na Aruba. E organisashon INTERPOL ta mira ku masha apresio pa pronto e dos paisnan aki por apliká pa nan miembresia moda ku nan por siguí ku nan miembresia den Interpol bou di nan mes respektivo nòmber di pais, meskos ku Aruba a hasié na 1987.

Durante e reunion diferente tópiko a wòrdu trata, entre otro:

Trafikashon – i kontrabanda di hende;
Krímen seksual kontra mucha;
Terorismo;
Labamentu di plaka;
Cybercrime;
Delikuensia kontra medio ambiente ;
i diferente proyekto ku ta andando

Durante e bishita di trabou di Sekretario General di Interpol, Sr. R.K. Noble na Kòrsou nos Minister di Hustisia a bai di akuerdo pa Kòrsou por postulá  su mes pa por organisá e di Bintidos (22) Konferensha Regional di Amérika di Interpol ku lo wòrdu tene na aña 2013. Esaki a wòrdu presentá ofishalmente durante di e konferensha na Aruba i na final di e konferensha a wòrdu aseptá pa aklamashon unánime pa tur e delegadonan presente.

http://www.24ora.com

Anuncios

Los comentarios están cerrados.