(Aruba) Hotel na Colony lo no por construi nada riba beach cu stroba acceso pa publico!

ORANJESTAD (AAN) – Señor Roland Peterson, Presidente di San Nicolas Business Association (SNBA), a saca un comunicado den cual e ta indica cu e asociacion ta di acuerdo cu construccion di un hotel na Colony, pero cu nan no ta desea pa e ta “all inclusive”, y ademas pa e beachnan keda publico. A base di e preocupacion aki cu sr. Peterson a manifesta, DIARIO a acerca Prome Minister mr. Mike Eman en busca di su opinion al respecto. Premier Eman a opta pa cuminza cu e di dos punto, bisando cu logicamente beach ta keda publico, y cu esey ta un exigencia a pone for di inicio, y un posicion cu AVP a pone hopi cla den Parlamento, den diferente mocion. Pues, no tin duda riba e acceso di e publico na e beach, y tampoco por construi nada di e hotel riba beach, of pone algo, cu ta bay limita su acceso.
“ Nos a mira e consecuencia ey caba na banda pazuid di Aruba, y nos no kier un repeticion di esey na banda pariba di nos Isla, y pa e motibo ey nos ta para firme pa esaki”, e dignatario a expresa.
Relaciona cu e politica di e hotel, si e ta bay tin componentenan di “all inclusive” e mandatario no por drenta den detaye, pasobra e no conoce e plannan specifico cu e hotel tin.
E dignatario a agrega cu conociendo e proyecto di hotel aki, como un iniciativa di Divi Resorts, nan operacion ta un combinacion. Kiermen, un parti cu ta bin “all inclusive” y tin un parti unda ta paga tarifa di camber pa dia sin nada mas acerca.
“ Si ta e mesun tipo di operacion aki nos no tin problema cune, pasobra e ta un combinacion y e efectonan lo ta positivo pa San Nicolas.
All inclusive nos a mira un of dos hotel na Aruba, y nos no por bisa cu nos ta hopi contento cu e efecto cu esaki ta trece pa restaurant, taxinan, etc., y mi no ta kere cu Minister di Turismo ta stimulando e pensamento di mas ‘all inclusive’ na Aruba, pero mi kier reserva e contesta riba esaki pasobra kizas Minister di Turismo tin un mehor contesta riba dje”, Premier Eman a agrega.

http://www.diario.aw

Anuncios

Los comentarios están cerrados.